Diamantvallei bestaan al sedert die negentigerjare as trouevenue en gastehuis. Dit is aanvanklik gebou deur die Breebaarts wat dit in 2003 verkoop het aan die Stomans, die huidige eienaars. Dit is tot 2019 deur Hendrik en Alida Verwoerd bestuur, wat toe afgetree het en in die Karoo gaan woon het. Tans bestuur en bemark die Kragdagspan onder leiding van HP en Lalie Steyn die venue. Ons is trots op die kwaliteit van diens wat hulle lewer, met vriendelike hulpvaardigheid en gasvryheid teenoor ons gaste. Die persoonlike aandag wat aan elkeen bestee word en die bereidheid om so veel as moontlik aan elke gas se unieke, spesiale behoeftes en versoeke te voldoen en selfs te probeer antisipeer, maak dat ons 'n baie buigbare diens kan lewer aan ons kliente (binne redelike perke).

Diamantvallei bied gasvrye akkommodasie in 'n rustige plaasatmosfeer met voëlgesang, pragtige uitsig en 'n woudbelewenis, net buite Pretoria - of dit vir 'n vinnige wegbreek, verblyf naby verskeie trou venues, of selfs besigheidsverblyf is. Akkommodasie bestaan uit drie dubbelkamers en twee familiekamers, waarvan een 'n bruidsuite is. Al die kamers is toegerus met 'n en-suite badkamer met verhitte handdoekreëling, 'n kaggel of verwarmer, asook koffie- en teemaakgeriewe. Sommige kamers beskik ook oor 'n mikrogolf en yskas - dui asb. aan met bespreking indien u dit benodig. Diamantvallei wil vir jou 'n gesellige, asook luukse, verblyf bied. Al die kamers is nuut oorgedoen in April/Mei 2021 met moderne fasiliteite, terwyl die statige, klassieke atmosfeer behou is. Bed en Ontbyt-akkommodasie is beskikbaar vir huweliksgaste (ook van troues by nabygeleë venues) of enige ander besoekers aan die area, wat graag naby aan die stad, maar tog nog in 'n landelike omgewing wil oorbly. Wifi en internettoegang is gratis beskikbaar vir aanlyn werk. (Kragopwekker en sonkrag word gebruik gedurende beurtkrag). Joe-Li Koffiewinkel, op perseel, is oop van Dinsdag tot Saterdag 08:00 - 16:00 en bedien ook ligte etes. 'n Lapa met braaigeriewe en 'n pizza-oond is beskikbaar vir selfsorg etes, asook 'n sekondere braai area indien die eerste reeds beset is. (Ekstra fooi, braaipakke kan aangekoop word. Diamantvallei is gesinsvriendelik - ekstra matrassies is beskikbaar in elke kamer, volgens ouerdiskresie en daar is uitgebreide, veilige buite speelruimte. Die plaas beskik oor 'n natuurlike dam en vlei-area waar geswem en geroei kan word op eie risiko en met eie toerusting. Daar is ook geleentheid vir veldfietsry of bergstap en piekniekplekkies (geen formele geriewe word verskaf nie). Let wel: ouers moet asb self verantwoordelikheid neem vir hulle kinders se veiligheid - alle aktiwiteite is op eie risiko. Die venue bied ook verskeie opsies vir troues, konferensies of konserte.

Die plaaslike omgewing is ryk aan geskiedenis, met klipskanse uit die Anglo-Boere-oorlog en tekens van veldslae en 'n krygsgevangenekamp. Sommige rotsformasies lyk of dit uit primitiewe tye dateer. Cullinan diamantmyn en museum is ongeveer 30 – 40 minute se ry van Diamantvallei af en die dorpie self beskik oor talle ou geboue uit die 19de eeu met pragtige, gesellige kafees en restaurante. Uit dieselfde era dateer die Sammy Marks museum, geleë op die ou Pretoria-Bronkhorstspruitpad – 'n Victoriaanse villa wat aan 'n Joodse sakeman behoort het, wat vriende was met president Paul Kruger. Die huis is 'n eksemplaar van 'n luukse woning uit die tydperk. Die kerngedeelte van Pretoria is slegs tussen 25 en 45km weg – ideaal vir 'n besoek aan die Voortrekkermonument, Pioniershuis Museum (die eerste, baie nederige huisie gebou in die streek), Irene konsentrasiekamp en ander museums en historiese geboue in en om die stad, asook die Pretoriase Dieretuin. Vir inkopies is daar verskeie winkelsentrums maklik bereikbaar, bv. Menlyn senturm, The Grove Mall, Atterbury Value Mart, Brooklyn Mall en selfs die uitgestrekte Woodlands sentrum. Daar is ook vele keuses op die restaurant- en naglewetoneel. Ook buitelugaktiwiteite, bv. Proteafees, Cullifest, antieke markte, parkdraf, bergfietswedrenne, motor cross resies, ens.